میر حیدر عزیزی

تورکای حیل اوغلو

 سید‏بدل‏اوغلو میر‏حیدر عزیزی 1270‏ـ‏جی گونش ایلینده گونئی آذربایجانین خالخال اؤلکه‏سینین «‏سیدلر زیوه‏سی‏» (زاویه سادات) کندینده آنادان اولموشدور‏.

ایلک تحصیلاتینی روحانی مکتبینده باشلایارکن‏، گرگین دوروملا اوزلشمگ مجبوریتینده تحصیلین داوام ائده بیلمه‏ییب، خالخالدان چیخماق مجبوریتینه اوزلشیر‏.

1289 ـ جی ایلده بؤیوک قارداشی سید‏مدد عزیزی ایله بیرلیکده صنایع مرکزلرینده ایشلمگه باشلاییب نهایت 1291 ـ جی ایلده وطن عشقی‏ایله چیرپینان اورک آنا یوردوندان اوزاق قالماغا دؤزه‏ بیلمه‏ییب بیر داها خالخالا قاییدیب، اکینچیلیک ایشلرینه مشغول اولموشودور.

میر‏حیدر عزیزی 1296 ـ جی ایلینده « عدالت » فیرقه‏سیله تانیش اولارکن، بو فیرقه‏یه گیرمکله رسمی اولاراق اینقالبی فعالیتلره اوز گتیردیلر‏. بو شهیدین اینقیلابی و آزاد‏لیق حرکاتینا جلب اولونماسیندا گؤرکملی اینقلابی حرکات خادمی رحمتلیک سید‏جعفر جوادزاده‏نین بؤیوک تأثیری اولموشدور‏.

صنایع مرکزلرینده‏، کارگر محیطینده اولماق‏، بئله محیطلرین پیس وضعیتلرین یاخیندان گؤروب و تجروبه‏لی اینقیلاب خادیملریله اؤزللیکله سید‏جعفر‏له تانیشلیقی میر‏حیدر عزیزی‏نین سیاسی شعورونون فورمالاشماسیندا بؤیوک رولو اولا بیلمیشدیر‏.

1321‏ـ‏جی ایلده توده حزبینین خالخال بؤلومونون أن چالیشقان اؤیه‏لریندن اولوب و نهایت 1324‏ـ‏جی ایلده آذربایجان دموکرات فیرقه‏سی قورولارکن توده حزبینی باشقا اؤیه‏لری کیمی بو حرکتی آذربایجان میلی منافع‏لرینه داها اویغون گؤروب بو آزادلیق و دموکرات حرکته قاتیلیر‏.

رحمتلیک پیشه‏ورینین تاپیشیریغی ایله تبریزه گئدیب، مجلس سئچگی‏لرینین 14‏ـ‏جی دوورونده جیدی صورتده فعالیت گوستریر‏. آذربایجان میلی حوکومتی قورولارکن بو حوکومتین ایصلاحات تدبیرلرینی حیاتا کئچیریلمه‏سینده باجاردیقدا چالیشیب و بو فیرقه‏نین مرام و آماجینی آچیغلاییب‏، نهضتین غلبه‏سینده اونون بیر فدایی باشچی‏سی کیمی‏ خیدمتلری نظره آلیناراق میلی حوکومت تکلیفی اساسیندا میلی مجلس طرفیندن 21 آذر میدالی‏له تلطیف اولونور‏.

شهید‏عزیزی‏، خلق ایشینه صداقتلی و باجاریغا چالیشما نتیجه‏سینله خالخال شهرستانینین خورش روستم و شاهرود اؤلکه‏لرینین اؤلکه باشقانی‏(‏بخشداری‏)‏نی قبول ائدرکن معین زاماندا بو اؤلکه لرین فدایی دسته‏لرینه باشچیلیق ائدیر‏.

شاهرودا ایرج‏خان و خورش روستم‏ده اکرم‏خان ایله ووروشماقدا اؤنجول اولاراق‏، فعال صورتده ایشتیراک ائدیب، خالقین اله گتیردیگی نائلیت‏لری ها‏بئله اؤلکه‏نین امنیت و آسایشینی قورماقلا، میلی حوکومت هدفلرینی قاباق آپارماقدا چوخ اؤنملی ائتگی بوراخیر‏.

1325‏ـ‏جی ایلده ایرتجاع قوشونلارینین میللتی آنلادیب زنگانا آذوقه یئتیرمک بهانه‏سیله بو اؤلکه توپ و تفنگ توکوب، بوتون قاباغا گلنلری اؤلدورمگه باشلاماق خبرینی آلارکن، تبریزدن خالخالا قایییدیر‏. ایرتجاعی‏لرین خالخالا گیرمکدن قاباغینی آلماق ایسته‏ییر و او اؤز فدایی‏لریله بیرلیکده ییرتیجی و قان‏ایچن پهلوی عسگرلرینین قاباغیندا سون گولـله‏سینه‏قدر دؤزوب و نهایت 43 فدایی‏لریله موحاصیریه آلینیب شیدتلی ووروشمادان سونرا، یولداشلار‏ینین چوخو شهید اولوب و اؤزیله بیر نئچه یولداشلاری توتولورلار‏. رحیمسیز و دؤزومسوز ایشکنجه‏لردن سونرا خورش روستم بؤلگه‏سینین مرکزی، هئیشئیین شهرینه گتیریلیب گوله‏له‏مک تصمیمی توتولور. گوله‏له‏مک زامانی اونون قولونو باغلاییب اوزونو دووارا ساری چئویرمگی ایسته ییرلر « من همیشه دوشمنله اوز‏ ـ‏ اوزه ووروشموشام … » سؤزو جاواب دئیرکن سؤزونو سونا چاتماغینا آمال وئرمه‏دن اونا آتیش آچیرلار‏.

شهید میر‏حیدر‏عزیز منحوس و سوی‏سئور (‏نژادپرست‏) پهلوی رژیمینین قولدور دسته‏لری طرفیندن فیزیکی جهتدن محو‏ ائدیلسه‏ده او‏، اؤلمه‏میشدیر‏. اونون آذربایجان 21 آذر حرکاتیندا خیدمت‏لری و عزیز خاطیره‏سی فداییلریمیزین‏، آزادلیق اوغروندا او و وروشانلارین کؤنلونده ابدی یاشایاجاقدیر‏.

 نوشته شده توسط جلالی